काठमाडौं: दलित अधिकारकर्मीको रूपमा चिनिएका खगेन्द्र सुनारमाथि गम्भीर विवाद उठेका छन्। मन्त्री बन्ने तयारीमा रहेका सुनारमाथि अदालतको अपहेलनादेखि ठगी र धम्कीसम्बन्धी दर्जनौँ उजुरीहरू दर्ता भएका खुलेको छ। यस अघि उनी कांग्रेस निकट रहेको समेत बताइएको छ ।
‘दलितका लागि दलित अभियान नेपाल’ का संयोजकसमेत रहेका सुनारमाथि सर्वोच्च अदालत जलाउने अभिव्यक्ति दिएकासहित विभिन्न व्यक्तिलाई सामाजिक सञ्जालमार्फत गालीगलौज र चरित्रहत्या गर्ने आरोप लागेको छ। अधिवक्ता मनिषा गौतमले गत वैशाख २० गते उनीविरुद्ध सर्वोच्च अदालतमा अदालतको अपहेलनासम्बन्धी मुद्दा दायर गर्नूभएको थियो । गौतमका अनुसार रुकुम पश्चिमको सोती घटनाबारे उच्च अदालत सुर्खेतले फैसला सुनाएपछि सुनारको नेतृत्वमा अदालतको गेटमै तोडफोड र नारा–जुलुस गरिएको थियो। सो घटनामा हत्या भए पनि जातीय छुवाछुत नभएको अदालतको निर्णयप्रति असन्तुष्ट रहँदै सुनारले न्यायाधीशहरूलाई सार्वजनिक रूपमा गाली गरेको र सामाजिक सञ्जालमा तस्बिर राखी अपमानजनक शब्द प्रयोग गरेको प्रमाणसमेत भेटिएको छ।त्यसपछि सुनारले अधिवक्ता गौतममाथि पनि साइबरबुलिङ गर्दै चरित्रहत्या र धम्कीपूर्ण सन्देशहरू पठाएको आरोप लागेको छ। गौतमका अनुसार, उनीविरुद्ध देशभर २३ वटा मुद्दा दर्ता भएका छन्।
सुनारको विगत पनि विवादास्पद रहेको पाइएको छ। सगरमाथा टेलिभिजनमा कार्यरत रहँदा उनी ठगी प्रकरणमा पक्राउ परी केही महिना जेल सजाय काटेका थिए। २०८१ असारमा दैलेखस्थित स्वास्थ्य संस्थामा तोडफोड र स्वास्थ्यकर्मीमाथि हातपात गरेको अभियोगमा पनि उनीविरुद्ध पक्राउ पुर्जी जारी भएको थियो।
न्यायिक प्रणालीमाथि आक्रमण गर्दै ‘अदालत जलाउनुपर्छ’ भन्ने व्यक्ति मन्त्री बन्ने तयारीमा रहेको विषयले राजनीतिक र कानुनी वृत्तमा तीव्र आलोचना उत्पन्न गरेको छ। अधिवक्ता गौतमले भनिन्, “न्यायाधीशलाई गाली गर्ने र अदालत जलाउने व्यक्ति कसरी मन्त्री बन्न सक्छरु यो न्याय र नैतिकताको उपहास हो।”
सुनार नेपाली कांग्रेस पृष्ठभूमिका व्यक्ति हुन्। उनी लामो समयदेखि गणेश लामा निकट रहँदै दलित अधिकारका मुद्दामा सक्रिय देखिए पनि पछिल्ला विवादहरूले उनको चरित्र र विश्वसनीयतामाथि प्रश्न उठाएको छ। उनले सेप्टेम्वर ६ देखि ९ सम्मका फेसबुक स्टाटसहरु भने मेटाइसकेका छन् ।
प्रतिक्रिया