संयुक्त अरब इमिरेट्स (यूएई)मा जारी एसीसी पुरुष यू–१९ प्रिमियर कप क्रिकेट प्रतियोगिताको सेमिफाइनल खेलमा नेपालले मलेसियामाथि शानदार जित निकालेको छ। मलेसियालाई ९ विकेटले हराउँदै नेपाल जारी यू–१९ प्रिमियर कपको फाइनलमा पुगेको हो।
शनिबार भएको एकदिवसीय खेलमा मलेसिया १७।२ ओभरमा ५१ रन बनाएर अलआउट भएको हो। मलेसियाले दिएको ५२ रनको सामान्य लक्ष्य पन्छाएको नेपालले १ विकेटको क्षतिमा ७।५ ओभरमा ५५ रन बनाउँदै शानदार जित निकालेको हो।
नेपालका लागि निरजकुमार यादव ३ बलमा ४ रन बनाएर आउट भए। वंश क्षेत्री २३ रन र निश्चल क्षेत्री १५ रनमा नटआउट रहे।
मलेसियाका लागि मोहम्मद अकरमले १ विकेट लिए।
यसअघि पहिला ब्याटिङ गरेको मलेसिया नेपाली बलरहरूले उत्कृष्ट प्रदर्शन गरेपछि अत्यन्तै न्यून स्कोरमा समेटियो। नेपाली बलरसामु निरीह बनेको मलेसियाले तीन रनमै दुई विकेट गुमायो। त्यसपछि मलेसियाले पाँच रनमा तेस्रो, सात रनमा चौथो र आठ रनमा पाँचौं विकेट गुमायो। यसैगरी, मलेसिया १३ रनमा छैटौँ, १३ रनमै सातौँ, ३३ रनमा आठौँ, ३८ रनमा नवौँ विकेट र ५१ रनमा अन्तिम विकेट गुमायो।
नेपालका लागि नितेशकुमार पटेलले चार विकेट लिए। यस्तै चन्दन रामले तीन विकेट लिए भने अपराजित पौडेल, अशोक धामी र रोशन विश्वकर्माले पनि एकरएक विकेट लिए।
यो जितेसँगै नेपाल आगामी एसीसी यू–१९ एसिया कपमा छनोट भएको छ। १४ टोलीको सहभागिता रहेको प्रतियोगिताबाट तीनवटा टोली आगामी एसीसी यू–१९ एसिया कपमा छनोट हुने प्रावधान छ।
यू–१९ एसिया कपको १२औँ संस्करण आगामी डिसेम्बर १२ देखि २१ तारिखसम्म यूएईमा आयोजना हुँदैछ।
प्रतिक्रिया