२० पुस, धनगढी : कैलालीमा लागूऔषधसहित ९ जनालाई पक्राउ गरिएको छ । शुक्रबार धनगढीसहित जिल्लाका विभिन्न स्थानबाट लागूऔषधसहित ९ जनालाई पक्राउ गरिएको प्रहरीले जनाएको छ ।
धनगढी उपमहानगरपालिका क्षेत्रबाट मात्र लागूऔषधसहित ७ जना पक्राउ परेका छन् । धनगढी उपमहानगरपालिका–२ भन्सार कार्यालय नजिकैबाट कञ्चनपुरको कृष्णपुर नगरपालिका–७ बस्ने ३४ वर्षीय मोहन रानालाई ६ ग्राम १८० मिलिग्राम लागूऔषध खैरो हेरोइनसहित पक्राउ गरिएको छ ।
रानाले चलाएको से ४ प ६८५९ नम्बरको मोटरसाइकललाई शंकाका आधारमा चेकजाँच गर्दा हेण्डलभित्र लुकाइछिपाइ राखेको अवस्थामा लागूऔषध बरामद गरिएको हो ।
धनगढी उपमहानगरपालिका–२ कै त्रिनगर भन्सार चोकमा सुपप्र०१–०११ प ६५३८ नम्बरको स्कुटरलाई शंका लागेर चेकजाँच गर्ने क्रममा चालक धनगढी–१३ बस्ने २९ वर्षीय बाहाली राना र पछाडी सवार धनगढी–६ बस्ने ३१ वर्षीय दिपक रानालाई पक्राउ गरिएको छ ।
उनीहरुको साथबाट पाँच सय मिलिग्राम लागूऔषध खैरो हेरोइन बरामद गरिएको छ ।
यस्तै, धनगढी उपमहानगरपालिका–१० को घुइयाघाटबाट २५ वर्षीय प्राभुपन रानालाई पक्राउ गरिएको छ । उनले चलाएको सु.प.प्र.०१–००९ प ५६२४ नम्बरको मोटरसाइकललाई शंका लागि चेकजाँच गर्दा अगाडीको भागमा लुकाइछिपाइ राखेको अवस्थामा ८४० मिलिग्राम खैरो हेरोइनसहित पक्राउ गरिएको प्रहरीले जनाएको छ ।
धनगढी उपमहानगरपालिका(१३ झोलुङ्गेपुल नजिकबाट कञ्चनपुरको कृष्णपुर नगरपालिका(९ बस्ने २४ वर्षीय प्रदिप राना र ३० वर्षीय अनिल रानालाई पनि लागूऔषधसहित पक्राउ गरिएको छ । उनीहरुको साथबाट ८९० मिलिग्राम लागूऔषध खैरो हेरोइन बरामद गरिएको छ ।
टीकापुर नगरपालिका–२ आखाँ अस्पताल नजिकैबाट सोही ठाउँ बस्ने २३ वर्षीय विक्रम बुढा र १९ वर्षीय मिलन टमटालाई पनि ८० मिलिग्राम लागूऔषध खैरो हेरोइनसहित पक्राउ गरिएको छ ।
यस्तै, धनगढी उपमहानगरपालिका–३ केदार टोलबाट बैतडीको पाटन नगरपालिका–८ घर भएर केदार टोलमा नास्ता पसल सञ्चालन गरी बसेका ४० वर्षीय रोशन महराको नास्ता पसलबाट लागूऔषध चरेस बरामद गरिएको छ । महराको पसलबाट ६९ ग्राम ३४० मिलिग्राम लागूऔषध चरेससहित उनलाई पक्राउ गरिएको प्रहरीले जनाएको छ ।
उनको पसलबाट १० लिटर अवैध घरेलु मदिरा समेत बरामद गरिएको छ । पक्राउ परेका सबैलाई नियन्त्रणमा राखेर थप अनुसन्धान भइरहेको प्रहरीले जनाएको छ ।
