पथलैयाबाट वीरगन्जतर्फ जाँदै गरेको ना।५ च २२७७ नम्बरको कुखुरा बोक्ने पिकअप गाडी अनियन्त्रित भई दुर्घटना हुँदा चालकको घटनास्थलमै मृत्यु भएको प्रहरीले जनाएको छ ।
मृत्यु हुनेमा वीरगन्ज महानगरपालिका–३० प्रोसतिपुर निवासी २२ वर्षीय जैमुदिन अंसारी रहेका छन् ।
प्रहरीका अनुसार तीव्र गतिमा रहेको पिकअप सडकको बीचमा रहेको डिभाइडरमा ठोक्किएपछि अर्को लेनमा पुगेको थियो । त्यसपछि पिकअप अनियन्त्रित भई सडकमा पल्टिएको थियो ।
दुर्घटनामा पिकअपका सहचालक विश्रामपुर गाउँपालिका–९ निवासी २० वर्षीय स्वयमभुला अंसारी घाइते भएका छन् । उनको वीरगन्जस्थित एलएस न्यूरो अस्पतालमा उपचार भइरहेको प्रहरीले जनाएको छ ।
दुर्घटनापछि प्रहरीले घटनास्थलमा पुगेर आवश्यक अनुसन्धान तथा मुचुल्का प्रक्रिया अघि बढाएको जनाएको छ । दुर्घटनाको थप कारणबारे अनुसन्धान भइरहेको छ ।
