हजराले बिना प्रमाण कसैलाई भ्रष्टाचारको आरोप लगाउनु राजनीतिक मर्यादा र जिम्मेवार लोकतान्त्रिक अभ्यासविपरीत भएको टिप्पणी गर्दै सांसद सुनारलाई प्रमाणसहित प्रस्तुत हुन चुनौती दिएका छन।
उनले भने, “तपाईंसँग भ्रष्टाचारसम्बन्धी ठोस प्रमाण छ भने सार्वजनिक रूपमा पेश गर्नुहोस् र आवश्यक कानुनी प्रक्रियामा जानुहोस। प्रमाणबिना कसैको चरित्रहत्या र परिवार माथि आरोप लगाउने प्रवृत्ति बन्द गर्नुपर्छ।”
हजराले राज्यका निकायमाथि प्रश्न उठाउने अधिकार सबैलाई भए पनि आरोप लगाउने व्यक्तिले त्यसको आधार र प्रमाणसमेत प्रस्तुत गर्नुपर्ने बताए। उनका अनुसार सरकारसँग प्रहरी, अख्तियार लगायतका सम्बन्धित राज्य संयन्त्रहरू रहेकाले भ्रष्टाचार भएको दाबी भए कानुनी प्रक्रियामार्फत छानबिन र कारबाही अघि बढाउनुपर्ने हुन्छ।
“तपाईंहरूसँग सरकार छ, राज्यका सम्बन्धित निकाय छन। त्यसैले सदनमा प्रमाणबिनाको आरोप लगाउने थलो बनाउनु हुँदैन,” हजराको भनाइ छ।
उनले राजनीतिक प्रतिस्पर्धाका नाममा व्यक्तिगत आरोप, चरित्रहत्या र सार्वजनिक संस्थामाथि प्रमाणबिनाको गम्भीर आरोप लगाउने शैलीले लोकतान्त्रिक संस्कार कमजोर बनाउने चेतावनीसमेत दिए।
हजराले सांसद सुनारतर्फ लक्षित गर्दै थप कडा प्रश्न उठाए, “प्रमाण छ भने पेश गर्नुस्, छैन भने आरोप लगाउन बन्द गर्नुस। राजनीति आरोप–प्रत्यारोपमा होइन, तथ्य, प्रमाण र जवाफदेहितामा आधारित हुनुपर्छ।”
प्रहरी प्रमुखमाथि संसद्मा उठाइएको विषय गम्भीर भएकाले त्यसको सत्यतथ्य प्रमाणका आधारमा सम्बन्धित निकायबाट छानबिन हुनुपर्ने भन्दै हजराले राजनीतिक भाषणभन्दा प्रमाण र कानुनी प्रक्रियालाई प्राथमिकता दिनुपर्ने बताएका छन।
