नेकपा (एमाले) का तर्फबाट पर्सा निर्वाचन क्षेत्र नम्बर १ का उम्मेदवार प्रदीप यादवले प्रतिनिधिसभा सदस्यका लागि उम्मेदवारी दर्ता गराएका छन् ।
यादवले ठुलो जुलुससहित दलबल लिएर जिल्ला समन्वय समिति पर्सास्थित निर्वाचन अधिकृतको कार्यालय पुगेर मनोनयन दर्ता गराएका हुन । उम्मेदवारी दर्ता कार्यक्रममा एमालेका नेता, कार्यकर्ता र समर्थकहरूको बाक्लो उपस्थिति रहेको थियो ।
पर्सा क्षेत्र नं. १ बाट उम्मेदवारी दर्ता गराएका प्रदीप यादव जनता समाजवादी पार्टी (जसपा) नेपाल परित्याग गरी आइतबार राति मात्र एमालेमा प्रवेश गरेका नवप्रवेशी नेता हुन् । पार्टी अध्यक्ष केपी शर्मा ओलीले काठमाडौँस्थित आफ्नै निवासमा उनलाई स्वागत गर्दै टिकट प्रदान गरेका थिए । पूर्व मन्त्री तथा पर्सा – १ बाटै दुई पटक सांसद भइसकेका यादवलाई विकास निर्माण र खानेपानी सङ्कट समाधानमा योगदान दिएका अनुभवी उम्मेदवारका रूपमा चिनिन्छ ।
मनोनयन दर्तापछि सञ्चारकर्मीसँग कुरा गर्दै यादवले संविधान, सङ्घीयता र लोकतन्त्र जोगाउन आफूले एमालेबाट उम्मेदवारी दिएको बताए । “जेन–जी आन्दोलनपछि संविधानमाथि परेको सङ्कटबाट जोगाउन एमाले अध्यक्ष केपी शर्मा ओलीले अहम् भूमिका खेल्नुभयो । सबै लुकेको समयमा उहाँ एक्लै संविधान र सङ्घीयताको पक्षमा उभिनुभएकाले उहाँको अडानबाट प्रभावित भएर मैले एमाले रोजेँ,” उनले भने । उनले ओली नेतृत्वको सरकारमा मन्त्री हुँदा नजिकबाट चिनेको र उनी सच्चा देशभक्त रहेको दाबी पनि गरे ।
यादवले यस पटक पनि पर्सा–१ मा विजयी हुने विश्वास व्यक्त गर्दै आगामी दिनमा एमाले सांसदका रूपमा मधेसका मुद्दा निरन्तर बोक्ने र वकालत गर्ने प्रतिबद्धता जनाए ।
उम्मेदवारी दर्तासँगै पर्सामा चुनावी गतिविधि थप तीव्र हुने देखिएको छ ।
प्रतिक्रिया