वीरगञ्जमा १९ औं नगर अधिवेशन सम्पन्न

वीरगञ्ज महानगरपालिकाको १९ औं नगर अधिवेशन सम्पन्न भएको छ। अधिवेशनबाट असोजमा भएको विशेष अधिवेशनमा कटौती गरिएको वडाको २५ प्रतिशत बजेट पुनः थप गर्ने प्रस्ताव पारित गरिएको छ।

गएको भदौ २३ र २४ गते जेन्जी आन्दोलनका कारण महानगरमा पुगेको क्षतिको पुनर्निर्माणका लागि असोजमा विशेष अधिवेशन भएको थियो। त्यस अधिवेशनले क्षतिग्रस्त संरचनाको प्राथमिकतामा पुनर्निर्माण गर्दै वडाको बजेट कटौती गरेको थियो।

हालको अधिवेशनमा पुनर्निर्माणका लागि आवश्यक स्रोत जुटाउँदै चालु आर्थिक वर्षमा १७ औं अधिवेशनले छुट्याएको वडातर्फको बजेट यथावत रहने निर्णय गरिएको छ। महानगर प्रमुख राजेशमान सिंहले अधिवेशनमा जानकारी दिँदै चालु आर्थिक वर्षको आय-व्ययको विवरण प्रस्तुत गरे।

उनका अनुसार अहिलेसम्म बिनियोजित कुल तीन अर्ब २२ करोड रुपैयाँमध्ये १ अर्ब १३ करोड रुपैयाँ खर्च भइसकेको छ। यसअनुसार बिनियोजित बजेटको ३३ प्रतिशत खर्च भएको छ। चालु खर्च तर्फ ३४।७८ प्रतिशत र पूँजीगत खर्च तर्फ ३२।६४ प्रतिशत खर्च भइसकेको प्रमुख सिंहले बताए।

महानगरपालिकाले यसै आर्थिक वर्षभित्र शुलभ औषधी पसल सञ्चालन, प्रयोगशाला विस्तार र नगर अस्पताल संचालनमा ल्याउने लक्ष्य राखेको छ।

अधिवेशनमा उपप्रमुख इम्तियाज आलम, प्रमुख प्रशासकीय अधिकृत अरविन्द लाल कर्ण, ३२ वटै वडाका वडाध्यक्ष, वडा सदस्य लगायतको सहभागिता रहेको थियो।