पर्सा जिल्लाको निर्वाचन क्षेत्र नम्बर–२ अन्तर्गत बहुदरमाई नगरपालिकाको बैरियामा जनता समाजवादी पार्टी (जसपा) नेपालको घरदैलो तथा जनसम्पर्क अभियान तीव्र रूपमा अघि बढेको छ। घरदैलो कार्यक्रमका क्रममा स्थानीय बासिन्दाबाट जसपा नेपालका उम्मेदवार अशोक टेमानीप्रति उत्साहजनक जनसमर्थन प्राप्त भएको छ।
आगामी निर्वाचनलाई लक्षित गर्दै सुरु गरिएको घरदैलो अभियानमा उम्मेदवार टेमानीले स्थानीय नागरिकसँग प्रत्यक्ष भेटघाट गर्दै क्षेत्रका समस्या, आवश्यकता र सम्भावनाबारे छलफल गरेका छन्। बैरियाका सर्वसाधारणले विगतदेखि नै उपेक्षित रहँदै आएको विकास, रोजगारी, शिक्षा, स्वास्थ्य तथा सिँचाइको सवालमा अब व्यवहारिक र परिणाममुखी नेतृत्व आवश्यक रहेको भन्दै अशोक टेमानीप्रति भरोसा व्यक्त गरेका छन्।
घरदैलोका क्रममा स्थानीयले “बोल्ने मात्र होइन, काम गर्ने प्रतिनिधि चाहिएको” धारणा व्यक्त गर्दै मधेसको हक–अधिकार, समावेशी विकास र सुशासनका पक्षमा निरन्तर आवाज उठाउँदै आएका टेमानी उपयुक्त विकल्प भएको प्रतिक्रिया दिएका छन। लामो समयदेखि क्षेत्रका समस्या नजिकबाट बुझ्दै आएका टेमानी जनतामाझ सहज, स्पष्ट र जवाफदेही नेताको रूपमा स्थापित हुँदै गएको देखिन्छ।
उम्मेदवार टेमानीले आफू विजयी भएपछी बहुदरमाई क्षेत्रलाई विकासको मूलधारमा जोड्ने, युवालाई रोजगारीमुखी कार्यक्रम ल्याउने र आधारभूत सेवा सहज रूपमा उपलब्ध गराउने प्रतिबद्धता व्यक्त गरेका छन्। उनले जनताको विश्वास नै आफ्नो सबैभन्दा ठूलो शक्ति भएको उल्लेख गर्दै जनसमर्थनलाई निर्णायक मतमा रूपान्तरण गर्न सबैलाई आग्रह गरे।
बैरियामा देखिएको जनउत्साह र सहभागिताले पर्सा–२ मा जसपा नेपालको स्थिति झनै बलियो बन्दै गएको संकेत गरेको छ। घरदैलो अभियानले चुनावी माहोललाई थप तातो बनाएको छ भने अशोक टेमानीलाई परिवर्तनको विकल्पका रूपमा जनताले स्वीकार गर्न थालेको स्पष्ट देखिएको छ।
यसरी, बहुदरमाई नगरपालिकाको बैरियामा सम्पन्न जसपा नेपालको घरदैलो कार्यक्रमले अशोक टेमानीको पक्षमा जनसमर्थन सुदृढ हुँदै गएको सन्देश दिएको छ, जसले पर्सा–२ को निर्वाचनलाई थप रोचक बनाउने निश्चित देखिन्छ।
प्रतिक्रिया