वीरगञ्ज- फागुन २१ गते हुने प्रतिनिधिसभा निर्वाचनलाई लक्षित गर्दै नेकपा एमालेले पर्सा निर्वाचन क्षेत्र नम्बर–१ मा चुनावी अभियानलाई थप तीव्र बनाएको छ। यही क्रममा वीरगञ्ज महानगरपालिका–११, श्रीपुरस्थित त्रिमूर्ति सिनेमा हलमा एमालेको सम्पर्क कार्यालय सञ्चालनमा आएको छ।
सम्पर्क कार्यालय उद्घाटनसँगै एमालेका नेता–कार्यकर्ता, समर्थकको उल्लेखनीय उपस्थितिले पर्सा–१ मा एमालेप्रति बढ्दो जनसमर्थन झल्काएको छ। कार्यकर्ताहरुले जनताको आवाज संसदसम्म प्रभावकारी रूपमा पुर्याउन सक्ने सक्षम र भरोसायोग्य उम्मेदवारका रूपमा प्रदीप यादव रहेको दाबी गरेका छन।
कार्यकर्ताहरूका अनुसार विकास, सुशासन र समृद्धिको स्पष्ट भिजन बोकेका प्रदीप यादव नै पर्सा–१ का लागि सही विकल्प हुन। “बोल्ने मात्र होइन, गरेर देखाउने नेतृत्व चाहिएको छ, र त्यो क्षमता प्रदीप यादवसँग छ,” स्थानीय कार्यकर्ताको भनाई छ।
सम्पर्क कार्यालयलाई आधार बनाएर घरदैलो अभियान, जनसंवाद, युवा तथा महिला केन्द्रित कार्यक्रमहरू सञ्चालन गरिने एमालेले जनाएको छ। पार्टीले विगतमा गरेको विकासका काम र आगामी दिनमा पर्सा–१ लाई आर्थिक, सामाजिक तथा भौतिक पूर्वाधारको हिसाबले अगाडि बढाउने योजनाबारे जनतालाई जानकारी गराउने रणनीति लिएको छ।
नेकपा एमालेले देशलाई स्थायित्व, विकास र राष्ट्रिय स्वाभिमानको मार्गमा अघि बढाउन निर्णायक भूमिका खेलेको भन्दै, यही निरन्तरताका लागि प्रदीप यादवको जित अपरिहार्य रहेको कार्यकर्ताहरूको दाबी छ।
पर्सा–१ मा बढ्दो जनलहर, संगठित अभियान र जनताको उत्साहले यस निर्वाचनमा नेकपा एमाले बलियो प्रतिस्पर्धीका रूपमा उभिएको स्पष्ट संकेत देखिएको छ।
प्रतिक्रिया