जनकपुरधाममा हरेक वर्ष भव्य रूपमा मनाइने सीताराम विवाह पञ्चमी महोत्सव आजबाट औपचारिक रूपमा प्रारम्भ हुँदैछ। पहिलो दिन ‘नगरदर्शन’ कार्यक्रमसँगै सप्ताहव्यापी धार्मिक पर्वको शुरुवात हुने जनकपुरधाम उपमहानगरपालिका र जानकी मन्दिर व्यवस्थापन पक्षले जनाएको छ।
सप्ताहव्यापी कार्यक्रमअनुसार शुक्रबार ‘फूलबारी लीला’, मंसिर ६ गते ‘धनुषयज्ञ’, ७ गते ‘तीलकोत्सव’, ८ गते ‘मटकोर’, ९ गते ‘स्वयंवर तथा शुभ विवाह’ र मंसिर १० गते ‘रामकलेवा’ विधिसहित महोत्सवको समापन हुने छ।
जनकपुरधाम क्षेत्रमा हाल महोत्सवका सबै तयारी तीव्र रूपमा जारी छन्। जानकी मन्दिर परिसर, रङ्गभूमि मैदान र बाह्रबिघा क्षेत्रमा सरसफाइ, आकर्षक पण्डाल निर्माण, इलुमिनेसनलगायतका संरचनात्मक काम पूरा गर्ने अन्तिम चरणमा पुगेका छन्। मन्दिर आसपासका गल्ली, मठ–मन्दिर र प्रमुख स्थलहरूमा पनि सजावट तथा विद्युत् बत्ती जडान भइरहेका छन्।
विवाह पञ्चमीका मुख्य कार्यक्रम यस वर्ष पनि जानकी मन्दिर परिसर र बाह्रबिघा रङ्गभूमि मैदानमै केन्द्रित रहनेछन्। मंसिर शुक्लपक्ष पञ्चमीका दिन मनाइने यस धार्मिक पर्वमा नेपाल तथा भारतका विभिन्न भू–भागबाट हरेक वर्ष जस्तै यसपटक पनि लाखौँ भक्तजनको आगमन हुने अपेक्षा गरिएको छ।
अयोध्या, ऋषिकेश, हरिद्वारसहित भारतका प्रमुख धार्मिक केन्द्रहरूबाट साधु–सन्त, महन्त, योगी, सन्यासी, भिक्षु तथा भिक्षुणीको उल्लेख्य उपस्थिति रहने जनकपुरधाम जानकी मन्दिर व्यवस्थापन समितिले जनाएको छ। मिथिलाञ्चलको सांस्कृतिक राजधानीका रूपमा परिचित जनकपुरधाममा यो महोत्सवले नेपाल–भारत धार्मिक तथा सांस्कृतिक सम्बन्ध सुदृढ गर्दै आएको छ।
विगतका वर्षमा सरकारी तर्फबाट आर्थिक तथा व्यवस्थापकीय सहयोग पाइने गरे पनि यस वर्ष भने त्यस्तो सहयोग नपाएको मन्दिरका उत्तराधिकारी महन्थ रामरोशन दासले गुनासो व्यक्त गरेका छन् ।
प्रमुख जिल्ला अधिकारी प्रेमप्रसाद लुइँटेलका अनुसार विवाह पञ्चमी महोत्सवलाई लक्षित गरी सुरक्षा व्यवस्था कडा पारिएको छ। भीड व्यवस्थापन, आपतकालीन तयारी, यातायात तथा शान्ति सुरक्षाका अन्य उपायहरूमा सुरक्षा निकायहरू उच्च सतर्कतामा छन् ।
प्रतिक्रिया