विराटनगर : आफूलाई प्रहरी बताएर अपहरण तथा लुटपाट गरेको आरोपमा मोरङ प्रहरीले दुई जनालाई पक्राउ गरेको छ । जिल्ला प्रहरी कार्यालय मोरङका अनुसार, पक्राउ पर्नेमा विराटनगर–८ का २४ वर्षीय समीर हुसेन र विराटनगर–६ का २५ वर्षीय तासिब अन्सारी छन् । घटनामा संलग्न अर्का एकजना फरार रहेको मोरङ प्रहरीले जानकारी दिइन् ।
प्रहरीका अनुसार, असार ११ गते बिहान ११ः१५ बजेतिर विराटनगर महानगरपालिका–१३ को महतो टोलबाट तीन जनाको समूहले आफूलाई प्रहरी बताएर विक्रमकुमार साहलाई अपहरण गरेका थिए । त्यसपछि उनीहरूले विराटनगर–१५ स्थित आँखा अस्पताल नजिकको रेलवे लाइनसम्म लगेर धम्क्याएर नगद लुटेका थिए ।
पीडित विक्रमका भिनाजु धर्मानन्द साहका अनुसार, विक्रमले सापटी लिएको तीन लाख ६४ हजार रुपैयाँ लिएर घर फर्कंदै थिए । त्यहीबेला अन्सारीसहितको समूहले विक्रमलाई नियन्त्रणमा लिएको थियो । विक्रमलाई पछाडि फर्केर हेरेमा ज्यान मार्ने धम्की दिएर उनीहरू रकम लुटेर भागेका थिए । प्रहरीका अनुसार, पक्राउ पर्नेविरुद्ध डाँका मुद्दा चलाउने तयारी गरिएको छ ।
प्रतिक्रिया