वीरगंजस्थित भारतको महावाणिज्य दूतावासले महिला सशक्तिकरण र समाजमा महिलाहरूको महत्वपूर्ण योगदानलाई उजागर गर्ने उद्देश्यका साथ अन्तर्राष्ट्रिय महिला दिवस विशेष कार्यक्रम आयोजना गरी मनाएको छ। कार्यक्रममा लैङ्गिक समानताको प्रवर्द्धन, महिलाहरूको उपलब्धिको सम्मान तथा समावेशी र समतामूलक समाज निर्माणका लागि सामूहिक प्रयासको आवश्यकता माथि जोड दिइएको थियो।
कार्यक्रममा सहभागी विशिष्ट महिला सामाजिक कार्यकर्ता तथा शिक्षाविद्हरूले आफ्ना अनुभव र दृष्टिकोण साझा गर्दै महिलाहरूले दैनिक जीवनमा हासिल गरेका उपलब्धिहरू र उनीहरूले सामना गर्ने चुनौतीहरूबारे प्रकाश पारेका थिए। वक्ताहरूले महिलाहरूलाई अवसर र समान अधिकार सुनिश्चित गर्न समाजका सबै पक्षबाट सकारात्मक पहल आवश्यक रहेको उल्लेख गरे।
यस अवसरमा ज्ञानदा एकेडेमी वीरगंज र शारदा कला केन्द्र रक्सौलका विद्यार्थीहरूले सांस्कृतिक प्रस्तुति दिएका थिए। उनीहरूको आकर्षक प्रस्तुतिले नेपाल र भारत बीचको साझा समृद्ध सांस्कृतिक सम्पदालाई झल्काउँदै कार्यक्रममा विशेष रौनक थपेको थियो।
नेपालका लागि भारतका महावाणिज्य दूत, वीरगंजका श्री डी.एस. मीनाले अन्तर्राष्ट्रिय महिला दिवसको महत्वबारे प्रकाश पार्दै समाजको विकास र प्रगतिमा महिलाहरूले पुर्याएको अमूल्य योगदानको प्रशंसा गर्नुभयो। उहाँले महिलाहरूलाई सशक्त बनाउने कार्यले समग्र समुदायलाई समृद्ध बनाउने विश्वास व्यक्त गर्दै समान अवसर र सम्मान सुनिश्चित गर्न सबैले मिलेर काम गर्नुपर्नेमा जोड दिनुभयो।
कार्यक्रमले महिला सशक्तिकरणप्रति समाजको प्रतिबद्धतालाई थप मजबुत बनाउँदै लैङ्गिक समानता र समावेशीताको सन्देश प्रवाह गरेको आयोजकले जनाएको छ।
